Parang binigay na ang sagot

PARANG BINIGAY NA ANG SAGOT

sa Hanap-Salita, tingnan ang pagkaayos

nang ito'y sinagutan ko talagang lubos

para bang ibinigay na ang tamang sagot

tinamad ba ang lumikha't di na kumayod?

hahanapin mo ang nilatag na salita

ngunit sagot ay pulos pahalang na sadya

ni walang pahilis, ni wala ring pababa

para bang tinamad talaga ang lumikha

araw-araw ba naman nila itong gawin

para sa pahayagang pang-araw-araw din

talagang minsan kumatha na'y tatamarin

sa pag-aakalang di naman mapapansin

gayunpaman, salamat sa palaisipan

at ako naman dito't talagang nalibang

sana'y ipagbale-balentong nila naman

nang tumagal ang paghanap sa kasagutan

- gregoriovbituinjr.

05.11.2023

* ang Hanap-Salita ay nasa pahayagang Pang-Masa, Mayo 11, 2023, pahina 7

Dalawang Pababa sa krosword

DALAWANG PABABA SA KROSWORD

minsan ay nakalilito ang dalawang Pababa

sa krosword pagkat titingnan ang tanong sa kabila

na para sa krosword sa itaas, matutulala

dahil Pahalang at Pababa ay di nagtutugma

kaya dapat alerto, dapat utak ay mabilis

bakit kaya ganoon, di magtugma, di magparis

huwag malito, nasa dyaryo lang ang tinutugis

para sa ibang krosword pala ang tanong na mintis

tanong sa One Pababa, gamit sa banyo, satin ba?

mali, sa isang One Pababa pa, klase ng tela

sa Two Pababa, ugali ba'y suksok sa baraha?

sa isang Two Pababa, ugali'y kostumbre pala

isa itong karanasan sa pagiging alerto

na magsuri ka pa rin, mata'y igalaw-galaw mo

tulad ng mga marites, madalas mag-usyoso

na iba pala ang tanong sa sinasagutan mo

tara, mag-ehersisyo ng isip sa pahayagan

at ating sagutan ang naroong palaisipan

kung may katagang di alam o ibang kahulugan

ay talagang mababatid mo rin sa kalaunan

- gregoriovbituinjr.

05.11.2023

* litrato mula sa pahayagang Bulgar, Mayo 7, 2023, p.11

Hinawan

HINAWAN

salitang ugat ng "hinawan" ay dalawa

ginamitan ng gitlapi at hulapi pa

hawan ang aking napagtanto noong una

ngunit nang makita ko ang sagot, iba pala

hinawan, tulad ng hinawan ko ang landas

na sa panitikan ginagamit madalas

hinawan pala, kung saan ka naghuhugas

o naghihinaw ng kamay, aking nawatas

bata pa ako, maghinaw na'y aking batid

dahil si ama, iyan ang salitang gamit

bago kumain, maghinaw ang magkapatid

sa pagsakol sa kanin, kamay na'y malinis

paghawan ng landas ay gamit ko sa tula

na minsan nababasa sa kwento't pabula

kaya sa palaisipan ay natunganga

sa hinawan ay ano bang ibang salita

isa ring nakabibiglang aral sa akin

salitang ugat ay iba kung unawain

di hawan, kundi hinaw, pag iyong isipin

at hulaping -an ang panlaping gamit man din

lababo pala yaong sagot sa hinawan

doon naghihinaw ng kamay kadalasan

iba ang hawan na gamit sa kaparangan

paghahawan ng damo upang malinisan

- gregoriovbituinjr.

05.08.2023

Natibò

NATIBÒ

di salitang Filipino ng "native" ang natibo

di dapat Kastilaloy o barok ang salin dito

pagkat "katutubò" ito sa wikang Filipino

tanong kasi'y nabubog, natibò ang sagot dito

mula sa salitang tibò, na mabagal ang bigkas

di tibô na lesbyana, na mabilis ang pagbigkas

ang tibò ay tinik sa talahiban sa Batangas

na sa lalawigan ni ama'y doon ko nawatas

bihira naman ang talahiban dito sa lungsod

bubog ang nakasusugat, kaya tanong: nabubog

natibò ay lalawiganing salitang natisod

o batid din marahil ng gumawa nitong krosword

kaya sa salitang "native", huwag itong isalin

ng "natibo" kundi "katutubò", taal sa atin

may impit naman ang natibò, dapat alam natin

at ilapat sa wasto kung sakaling gagamitin

- gregoriovbituinjr.

05.06.2023

* ang krosword ay mula sa pahayagang Pilipino Star Ngayon, Mayo 5, 2023, p.14